អំពីយើង

សារពី
នាយកប្រតិបត្តិ

សូមគោរពដោយស្មោះអស់ពីដួងចិត្តចំពោះ ដៃគូអាជីវកម្ម មន្ត្រីរាជការ សហការីអាជីវកម្ម ម្ចាស់ភាគហ៊ុន និងនិយោជិតទាំងអស់ជាទីគោរព!

ខ្ញុំពិតជាមានសេចក្តីសោមនស្សយ៉ាងខ្លាំងក្រៃលែង ដែលខ្ញុំបានចូលរួមចែករំលែក លើដំណើរនៃការរីកចម្រើនរបស់ធនាគារ KDSB ជាមួយអ្នកទាំងអស់គ្នា។ ខ្ញុំសូមថ្លែងអំណរគុណយ៉ាងជ្រាលជ្រៅបំផុត ចំពោះអ្នកទាំងអស់គ្នាសម្រាប់ការជឿទុកចិត្ត និងការគាំទ្រឥតងាករេរបស់អ្នកទាំងអស់គ្នា។

ធនាគារ KDSB បានចាប់ផ្តើមដំណើរការអាជីវកម្មរបស់ខ្លួនតាំងពីខែមីនាឆ្នាំ 2018 ជាមួយនឹងការវិនិយោគដើមទុនដំបូងបំផុតចំនួន 74.2 លានដុល្លារអាមេរិកតែប៉ុណ្ណោះ។ ចាប់តាំងពីពេលនោះមក យើងបានលះបង់ខ្លួនរបស់យើង ក្នុងការលើកកម្ពស់គុណភាពជីវិតរបស់ប្រជាជនកម្ពុជា តាមរយៈការផ្តល់ហិរញ្ញប្បទានរថយន្តថ្មី និងរថយន្តប្រើប្រាស់រួច (មួយតឹក) កម្ចីគ្រឿងយន្តកសិកម្ម កម្ចីទិញផ្ទះ និងអចលនទ្រព្យជាដើម។ ជាលទ្ធផលនៃឆន្ទៈដ៏មុតមាំរបស់យើង ឥឡូវនេះធនាគារ KDSB បានរីកចម្រើនទៅជាស្ថាប័នហិរញ្ញវត្ថុមួយដ៏រឹងមាំ ដែលមានទ្រព្យសកម្មសរុបឈានរហូតដល់ 232.4 លានដុល្លារអាមេរិក។

លើសពីនេះទៅទៀត នៅខែធ្នូ ឆ្នាំ 2024 យើងបានបញ្ចប់ការរំលាយក្រុមហ៊ុនបញ្ចូលគ្នាដោយជោគជ័យជាមួយក្រុមហ៊ុន អាយ-ហ្វាយនែន លីស៊ីង ភីអិលស៊ី (“iFL”) ដែលជាក្រុមហ៊ុនឯកទេសខាងភតិសន្យាហិរញ្ញវត្ថុ ដោយការពង្រឹងជំហរដ៏មុតមាំនេះ បានប្រែក្លាយយើងទៅជាធនាគារឯកទេសដែលឈានមុខគេនៅកម្ពុជា។ សមិទ្ធិផលដ៏អស្ចារ្យនេះ នឹងមិនអាចសម្រេចទៅបាននោះទេ ប្រសិនបើគ្មានការជឿទុកចិត្ត និងការគាំទ្ររបស់អ្នកទាំងអស់គ្នា។

ក្រុមហ៊ុនមេរបស់យើងគឺ ក្រុមហ៊ុន KB Kookmin Card ដែលជាបុត្រសម្ព័ន្ធមួយរបស់ក្រុមហ៊ុន KB Financial Group ដែលជាក្រុមហ៊ុនហិរញ្ញវត្ថុឈានមុខគេរបស់ប្រទេសកូរ៉េខាងត្បូង បានផ្តល់ការគាំទ្រឥតងាករេដើម្បីធានាបាននូវកំណើនប្រកបដោយស្ថិរភាព និងនិរន្តរភាពរបស់ធនាគារ KDSB ។ ដើម្បីឆ្ពោះទៅមុខ យើងនឹងនៅតែបន្តសហការយ៉ាងជិតស្និទ្ធជាមួយក្រុមហ៊ុន KB Kookmin Card ដើម្បីផ្តល់ជូននូវដំណោះស្រាយហិរញ្ញវត្ថុប្រកបដោយភាពច្នៃប្រឌិត និងលើកកម្ពស់សេវាកម្មហិរញ្ញវត្ថុរបស់យើង ជូនចំពោះអតិថិជនដ៏មានតម្លៃរបស់យើង។

បុគ្គលិកដែលខិតខំប្រឹងប្រែងចំនួន 370នាក់ របស់ធនាគារ KDSB យើងខ្ញុំ ត្រូវបានរួបរួមគ្នាក្រោមចក្ខុវិស័យតែមួយគឺ៖ "ជម្រុញដោយការប្រើប្រាស់ទេពកោសល្យលំដាប់ពិភពលោក និងភាពច្នៃប្រឌិតដ៏ក្លាហាន ដើម្បីក្លាយខ្លួនជាដៃគូជីវិតដ៏រីករាយដែលលោកអ្នកជឿទុកចិត្ត" ("Driven by world-class talents and bold innovation, to become your trusted happy life partner.")។ ជាមួយនឹងគោលការណ៍ណែនាំនេះ យើងនៅតែប្រកាន់ខ្ជាប់នូវបេសកកម្មរបស់យើង ដើម្បីក្លាយខ្លួនជាគ្រឹះស្ថានហិរញ្ញវត្ថុដែលមានស្ថិរភាព និងមានសក្តានុពលខ្ពស់បំផុតនៅក្នុងប្រទេសកម្ពុជា។
‍
នៅពេលដែលយើងនៅតែបន្តដឹកនាំឧស្សាហកម្មហិរញ្ញវត្ថុនៅក្នុងប្រទេសកម្ពុជាតាមរយៈការច្នៃប្រឌិត និងមហិច្ឆតាឥតឈប់ឈរ យើងនឹងឆ្ពោះទៅរកការរីកចម្រើនរួមគ្នាជាមួយលោកអ្នក។

ដោយសេចក្តីគោរពអំពីខ្ញុំ
‍LAH SEA HWAN
‍នាយកប្រតិបត្តិ

ចក្ខុវិស័យ បេសកកម្ម និង គោលតម្លៃស្នូល

ចក្ខុវិស័យរបស់ធនាគារ KDSB គឺក្លាយខ្លួនជាធនាគារឯកទេសតាមរយៈបទពិសោធន៍ជោគជ័យពីប្រទេសកូរ៉េខាងត្បូង។បេសកកម្មរបស់ធនាគារ KDSB គឺធ្វើឱ្យអតិថិជនមានអារម្មណ៍រំភើបរីករាយតាមរយៈការផ្តល់សេវាកម្មឆាប់រហ័ស និងមានភាពបត់បែន ដូចជាការបើកបររថយន្តទំនើប (supercar) នៅលើផ្លូវហាយវេយ៉ាងដូច្នោះដែរ។

ចក្ខុវិស័យ

ដឹកនាំដោយអ្នកជំនាញកម្រិតពិភពលោក និងរបបគំហើញថ្មីៗដើម្បីក្លាយខ្លួនជា ដៃគូជីវិតដ៏រីករាយ និងគួរជាទីទុកចិត្តរបស់អតិថិជន។
គោលដៅរបស់យើង គឺក្លាយខ្លួនជាក្រុមហ៊ុនហិរញ្ញវត្ថុយូរអង្វែងមួយតាមរយៈរបបគំហើញថ្មីៗឈានមុខគេដែលផ្លាស់ប្តូរគំរូហិរញ្ញវត្ថុដោយអ្នកជំនាញដែលមានវិជ្ជាជីវៈច្បាស់លាស់របស់យើង។
‍
បេសកកម្ម

ការផ្តល់សេវាកម្មហិរញ្ញវត្ថុ ធ្វើឱ្យមានការផ្លាស់ប្តូរ - ជីវិតកាន់តែរីករាយ និងពិភពលោកកាន់តែល្អប្រសើរ
យើងផ្តោតលើការផ្តល់សេវាហិរញ្ញវត្ថុដែលនាំមកនូវសេចក្តីសុខ និងសុភមង្គលដល់អតិថិជន និងសង្គម។

គោលតម្លៃស្នូល

របាយការណ៍សង្ខេបហិរញ្ញវត្ថុប្រចាំឆ្នាំ

ឆ្នាំ 2023 គឺជាឆ្នាំដ៏លំបាកបំផុតក្នុងប្រវត្តិសាស្ត្ររបស់ KDSB ពីព្រោះយើងប្រឈមមុខនឹងការលំបាកជាច្រើនពីផលប៉ះពាល់នៃកត្តាខាងក្រៅ ដូចជាវិបត្តិសេដ្ឋកិច្ចពិភពលោក។ ទោះជាយ៉ាងណាក៏ដោយ យើងនៅតែអាចគ្រប់គ្រងវិបត្តិបានល្អ និងរក្សាបាននូវតួលេខហិរញ្ញវត្ថុខាងក្រោម។

វប្បធម៌ធនាគារ

KDSB បានបង្កើតឡើងជាមួយនឹងវប្បធម៌ធនាគារដ៏ប្លែកដែលធ្វើឱ្យ KDSB ក្លាយជាស្ថាប័នធនាគារដែលមានភាពខុសគ្នាទៅនឹងស្ថាប័នធនាគារដទៃនៅក្នុងប្រទេសកម្ពុជា។

ថ្នាក់សិក្សាភាសាកូរ៉េ ថ្នាក់សិក្សាភាសាកូរ៉េត្រូវបានបង្កើតឡើងនៅក្នុងឆ្នាំ២០១៩។ បន្តពីឆ្នាំ២០១៩ វគ្គមូលដ្ឋានភាសាកូរ៉េត្រូវបានផ្ដល់ជូនដល់បុគ្គលិកដែលមានឆន្ទៈរៀនភាសាថ្មីដើម្បីការរីកចម្រើនអនាគតរបស់ពួកគេ។ ថ្នាក់សិក្សានោះត្រូវបានបញ្ចប់ដោយជោគជ័យនៅក្នុងឆ្នាំ២០២០ ហើយសិស្សដែលបានបញ្ចប់វគ្គនេះដោយជោគជ័យត្រូវបានប្រគល់រង្វាន់និងវិញ្ញាបនបត្របញ្ចប់ការសិក្សាពីនាយកប្រតិបត្តិ។

ក្លឹបអាហារកូរ៉េ ក្លឹបអាហារកូរ៉េ គឺជាវប្បធម៌ប្លែកគេរបស់ធនាគារ KDSB។ វាត្រូវបានបង្កើតឡើងក្នុងគោលបំណងធ្វើឱ្យបុគ្គលិកសប្បាយរីករាយ បន្ទាប់ពីការខិតខំធ្វើការរបស់ពួកគេពេញមួយសប្ដាហ៍។ ដូច្នេះ ក្លឹបនេះបើកនៅល្ងាចថ្ងៃសុក្ររៀងរាល់ពីរសប្ដាហ៍ម្តង។ តាមរយៈការចូលរួមនៅក្នុងក្លឹបនេះ បុគ្គលិកអាចសិក្សាអំពីប្រវត្តិសាស្ត្រ/វប្បធម៌នៃមុខម្ហូបនីមួយៗ និងរបៀបក្នុងការចម្អិនម្ហូបកូរ៉េដ៏ពេញនិយម។ មិនត្រឹមតែផ្ដល់នូវចំណេះដឹងពាក់ព័ន្ធនឹងអាហារបរទេសប៉ុណ្ណោះទេ ប៉ុន្តែក្លឹបនេះក៏ជាកន្លែងដែលបុគ្គលិកកសាងទំនាក់ទំនងល្អក្នុងផ្នែក/ក្រុមផងដែរ។ ភាពរីករាយរបស់បុគ្គលិកត្រូវបានសម្ដែងចេញតាមរយៈទឹកមុខញញឹម និងការជជែកលេងយ៉ាងសប្បាយរបស់ពួកគេអំឡុងពេលនៅក្នុងថ្នាក់បង្រៀននីមួយៗរបស់ក្លឹប។