ជូនចំពោះអ្នកពាក់ព័ន្ធទាំងអស់ជាទីគោរពរាប់អាន
សូមស្វាគមន៍មកកាន់ធនាគារឯកទេស ខេប៊ី ដេហាន (ធនាគារ KDSB)!

ជាបឋម ខ្ញុំសូមថ្លែងអំណរគុណ និងសំដែងការកោតសរសើរយ៉ាងស្មោះអស់ពីចិត្តចំពោះអតិថិជនជាទីគោរព បុគ្គលិកដែលបានខិតខំប្រឹងប្រែង ដៃគូអាជីវកម្មដែលតែងតែគាំទ្រ ក្រសួង និងនិយ័តករដែលតែងតែជួយជ្រោមជ្រែង និងអ្នកពាក់ព័ន្ធដ៏មានតម្លៃទាំងអស់របស់យើង សម្រាប់ការគាំទ្រ និងការចាប់អារម្មណ៍គ្មានទីបញ្ចប់របស់អ្នកទាំងអស់គ្នាចំពោះធនាគារ KDSB។ លោកអ្នកបានដើរតួនាទីយ៉ាងសំខាន់ក្នុងភាពជោគជ័យ និងការរីកចម្រើនរបស់យើង។

ក្នុងរយៈពេល៥ឆ្នាំនៃការកកើតនេះ ធនាគារ KDSB មានការអភិវឌ្ឍន៍គួរឱ្យកត់សម្គាល់។ ចាប់ផ្ដើមពីធនាគារឯកទេសតូចបំផុតមួយក្នុងឆ្នាំ២០១៨ ឥឡូវនេះយើងបានក្លាយជាធនាគារឯកទេសដ៏ល្បីមួយលើផ្នែកកម្ចីទិញរថយន្ត ជាមួយនឹងដើមទុនចុះបញ្ជីជាង៧៣លានដុល្លារ។

ក្នុងនាមជាសមាជិកនៃ KB Financial Group ដែលជាក្រុមហ៊ុនហិរញ្ញវត្ថុឈានមុខគេ ផ្អែកលើអតិថិជនច្រើនជាងគេ និងមានបណ្តាញសាខាយ៉ាងទូលំទូលាយបំផុតនៅក្នុងប្រទេសកូរ៉េខាងត្បូង យើងប្តេជ្ញា ផ្តល់ជូនអតិថិជនរបស់យើងនូវសេវាកម្មរហ័ស បត់បែន និងសុវត្ថិភាព ដូចដែលពួកគេកំពុងបើកបររថយន្តទំនើបនៅលើផ្លូវហាយវេយ៉ាងដូច្នោះដែរ។ មិនត្រឹមតែផលិតផលហិរញ្ញវត្ថុរថយន្តប៉ុណ្ណោះទេធនាគារ KDSB ផ្តល់ផលិតផលកម្ចី និងឥណទានជាច្រើនប្រភេទទៀត ដូចជា កម្ចីគេហដ្ឋាន កម្ចីសាជីវកម្ម កម្ចីគ្រឿងយន្តកសិកម្ម និងផលិតផលប័ណ្ណផងដែរ។ ផលិតផលទាំងនេះត្រូវបានរចនាឡើងដើម្បីបំពេញតម្រូវការអតិថិជនរបស់យើងក្នុងយុគសម័យទំនើបនេះ។ យើងយល់ច្បាស់ពីលក្ខណៈពិសេសនៃតម្រូវការ និងគោលដៅហិរញ្ញវត្ថុរបស់អតិថិជនម្នាក់ៗ ហើយយើងនឹងព្យាយាមផ្តល់នូវដំណោះស្រាយដ៏ល្អបំផុតសម្រាប់ទាំងបុគ្គល និងក្រុមហ៊ុន។

នៅតាមផ្លូវជាមួយនឹងដំណើរដ៏ជោគជ័យ និងគួរឱ្យកត់សម្គាល់នេះ យើងបានប្តេជ្ញាចិត្តចំពោះនិរន្តរភាព និងការអភិវឌ្ឍន៍សង្គមតាមរយៈការធ្វើសកម្មភាពទំនួលខុសត្រូវសង្គមផ្សេងៗ។ យើងតែងតែដកយកប្រាក់ចំនេញមួយចំនួនរបស់យើងដើម្បីតបស្នងដល់សង្គមវិញ ដោយអនុវត្តគម្រោងបរិច្ចាគសៀវភៅ ការជួសជុល/សាងសង់បណ្ណាល័យ ការសាងសង់អគារសិក្សា មជ្ឈមណ្ឌលបណ្តុះបណ្តាលកសិកម្ម កម្មវិធីគាំទ្រផលិតផលកែច្នៃ ការដំឡើងកញ្ចក់ចរាចរណ៍។ល។ ខ្ញុំជឿជាក់ថា ការរួមចំណែកតិចតួចរបស់ក្រុមហ៊ុននីមួយៗ រួមទាំងធនាគារ KDSB នឹងធ្វើឱ្យមានការផ្លាស់ប្តូរដ៏ធំមួយសម្រាប់សង្គមកម្ពុជាកាន់តែប្រសើរឡើង។

គ្មានសមិទ្ធផលណាមួយរបស់យើង (ទាំងសមិទ្ធិផលអាជីវកម្ម និងសមិទ្ធិផលទំនួលខុសត្រូវសង្គម) នឹងអាចធ្វើទៅបានដោយគ្មានការគាំទ្រពីអតិថិជន បុគ្គលិក ដៃគូអាជីវកម្ម ក្រសួង និងនិយ័តករ និងអ្នកពាក់ព័ន្ធទាំងអស់របស់យើងឡើយ។ យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះការគាំទ្រ ការសហការ និងការរួមចំណែកដែលឥតងាករេរបស់អ្នកទាំងអស់គ្នា។

យើងសន្យាថានឹងផ្តល់ជូនលោកអ្នកនូវដំណោះស្រាយហិរញ្ញវត្ថុដ៏ល្អបំផុត និងធ្វើឱ្យលោកអ្នកបន្តដំណើរលើ "មាគ៌ាហិរញ្ញវត្ថុថ្មីរបស់លោកអ្នក" ជាមួយ KDSB។

ក្នុងឆ្នាំ២០២១ ធនាគារ KDSB បានបង្ហាញពីកំណើនប្រាក់ចំណេញសុទ្ធយ៉ាងអស្ចារ្យដល់ទៅ ១៤២.៦% នៅក្នុងពេលប្រឈមនឹងការឆ្លងរាលដាលនៃជំងឺកូវីដ-១៩ ដែលពុំធ្លាប់មាន។ ក្នុងអំឡុងពេលវិបត្តិដែលអូសបន្លាយពេលនេះ ផ្អែកតាមចំណេះដឹងនិងបទពិសោធន៍នៃការគ្រប់គ្រងហានិភ័យដ៏ល្អប្រសើរ ដែលទទួលបានពីក្នុងប្រទេសកូរ៉េខាងត្បូង ធនាគារ KDSB នៅតែអាចគ្រប់គ្រងហានិភ័យបានយ៉ាងល្អដដែល។ កំណើនទ្រព្យសកម្មសរុបគឺភាគច្រើនទទួលបានពីកំណើននៃចំនួនការផ្ដល់ប្រាក់កម្ចី ដែលមានការកើនឡើងគួរឱ្យកត់សម្គាល់ពីមួយឆ្នាំទៅមួយឆ្នាំ។